Leev Gillschwestern, leev Gillbröder,

dat Oosterfest steiht weller vör de Döör un doch is dat  nee so as sünst. De Vögel bugen ehre Nester un de Blomen fangt an to wassen un to bleun. Sowiet allns klor, un doch is wat anners, dor kanns över sinnieren un di een Kopp maken. Wat is nee so as sünst?

Ja, du hüürst weller de Vögel piepen. De Larm vun de Straten fehlt, wo sünd de Autos al bleven? Uk an Himmel sühst du keen Fleger mier mit de Kondensstriepen achteran. Dorför sühst du weller Kinner up de Straten speelen un ok luthals mit ehrn Geschwisterkinner strieden  . De Butenwelt hett sick verännert. Du kannst lang de Straten flaneern un sühst hier un dor mol een anner Minschenkind. Hin un weller kümmt uk mol een Auto vörbi, avers dat is selten. De meisten Geschäfte un Lokale hebbt dicht. Alle Veranstaltungen un grötere Minschenansammlungen sünd verbaden.Nur de Geschä fte mit levensnotwendige Artikel hebbt noch open. Hier sühst du watt fantastischet: de Lüüd hold Avstand , as wenn de Vörmann nee good rüken deit. Hin un weller kann man uk een Minschen mit Spieschutz vört Muul sehen.

Al dat is een Resultat vun son lütten Virus. Dit lüüte Ding, dat du nur ünner een Elektronenmikroskop wohrnehmen kannst, verbred sik wohrhaftig flink över de ganze Welt un höld uns in Atem. Un dorgegen is noch keen Kruut wussen. Wi dörpt uns nee ansteeken laten. Denn dann büst du op´n besten Pad int Krankenhuus. Dann hest du son´ne Art Lungenentzündung, bi de nee noog Sauerstoff vun de Lung in´t Blood röbergeiht. Un wenn du Glück hest, geiht de Düvel an di vörbi. Avers wenn dat läger mit di ward, kümmst ünner een Sauerstoffpustmaschin, de di mit Atü Sauerstoff in de Lung drücken deit. Veele ward weller gesund, avers männich een starvt dorbi.

Uns Regierung hett restriktive Anordnungen rutgeben, dormit wi uns nee so flink ansteeken köönt. De Kinnergardens un de Scholen sünd tau. Veele Koophüser , veele Restaurants, ok veele Fabriken sünd taumakt worrn. Dat Leeven up de Straaten is utstorben. Un dat allns, dormit wi överleeven schüllt. Dat allns is nich gegen uns, sünners nur dorför, dat wi de Chance hebbt, to överleeven un later dann weller düchtig tosamen klönen, verreisen, un natürli Gill fiern to können. Avers bit dorhin mööt wi vernünfti blieven.

Oostern lööpt nee weeg. Fiert Oostern mit de Familie to Huus, laat dat uk een beten lies angahn un gedenkt all de Lüüd, de verstorven sünd un ne mit de Angehörigen Oostern fiern köönt. Ik drück ju all de Duums , dat ju heel dörch de maladen Tieden kaamt . Denn gesund blieven is beeter as nipp un nau to fiern. De Situation verlangt veel vun uns af, weest stark un plietsch un slaagt de Viren een Schnippchen!

Frohe Oostern, blievt gesund un hold ju fuchtig !

 Hans-Peter Flindt

1.Öllst