Moin, Moin,

leeve Gillschwestern un Gillbröder. De Sommer hett uns verlaten un de Harvst höllt Intog.

Wi vun Vörstand hopt, dat ju all bi bester Gesundheit sünd un den Sommer           unbeschood överstahn hebbt. Corona – mag man bald nee mier hüren – hett uns jümmers noch vull tofaten. Mit een Oog pliert wi Dag för Dag na de sick verännern Verordnungen vun uns Regierung un mit dat anner Oog na Möglichkeiten Akschoon` för uns Gill uttokieken. De Speelroom is bannig eng. Dat Grillen ünner de Vagelstang hebbt wi uk al strieken möten, avers de          Verordnungen wiern ne ümtosetten. Schaad ! De Gill hett avers twischendörch doch wat do doon. De Schaffers un uns drütt          Öllermann Karsten Prokoph hebbt een niegen Beerstand för de Sporthall tosamen-schustert. Dat hebbt se richti fein hinkreegen. Nu mutt noch een beten Farv dor op un dat Beer kann lopen.

To´n annern  hebbt wi tosamen uns Ingang to de niege Gillstuv schöön makt. Uns ole Majestät un Ehrenbörger vun Olenborg, Günter Reinhold, hett in sien Fritied een eeken Rundbogen schnitzt un saagt. Nu hett de Ingang een feinen Rohmen kreegen. Gillbroder Reinhold to Ehren hebbt wi ne lütte Plakett an´n   Foot vun den`n Bogen anbröcht.

De Vörroom vun uns Gillstuv is uk rutputzt worrn. An de Wand hebbt wi Ehrentöller anbröcht un dortwischen hett ´ne smucke ole Garderov ehrn Platz funnen. Nu köönt wi uns Gillröck, Stöck un Zylinders good an´n Haken bringen.

Liekers kiekt wi na vörn un plant al Düt un Dat för`n November. Vörn an steiht dat  „Gill – Stadt – Pokalscheeten“ , achterna de Volkstruerdag un dann dat Teltgemeenschapscheeten in tosamenstreeken Form, allns na Coronavörschrift.      Wenn de Coronainfektionstahln de tokamen Weeken düchtig na baben klettern doot, sünd de Utsichten för uns November-Planungen meist düster. Avers wi laat uns ja nee bang maken, wi kiekt na vörn un hoopt dat Best.

Leeve Gillschwestern un Gillbröder, de Vörstand vun uns St. Johannis Doden- un Schüttengill vun 1192 wünsch ju goode Gesundheit för de tokamen Tieden, dormit wi all tofreden in de Tokunft kieken köönt.

         In`n Noom vun Vörstand

         Hans-Peter Flindt

         1. Öllst