Archiv der Kategorie: 2020

WIEHNACHTSBREEF

                                    

Gloven  un  Hopen

      Leev Gillswestern , leev Gillbröder , leev Binnen- un Butenolenborger , dat Johr geiht bald to Enn un de Küll krüppt över dat Land . De Sünn schult noch een beten övern Horizont un is batts weller verschwunnen . De Bööm smiet de Blääd daal un veele Vagels verreist in´n Süden . Een sülvst warrt son beten nuddelig un is op de Söök na Warmste un Licht .  Nu hölpt blots noch de Bolleroven , de Fuulbank un de Wulldeck , een godet Book un een poor kommodig Lichter.   Dat is de Tiet vör Wiehnachten , dat is de  Advent . Wi kiekt na binnen un fangt an to sinnieren . Dat Flackern vun de Kerzen maakt di son beten trantüddelig un diene Gedanken swirren dörch dat Land un du fraagst di : wer büst du , wat maakst du , wo kümmst du van af un wo willst du hin ? Du maakst di Gedanken över de Heimat:           wo un wat is Heimat ? Jo , Heimat is dor, wo du di utkennst, wo du opwussen büst . Heimat is uk dor, wo du seker büst , wo diene Familie is ,wo diene Frünn sünd un wo du willkamen büst . So is dat uk mit de grote Gillfamilie . Jümmers to de Gillfiern koomt de Gillswestern un Gillbröder vun nah un wiet wegg tosamen, üm Gill to fiern, Familie un Frünn weller in de Arms to nehmen .                                       Gill is uk een Stück Heimat . De Advent maakt uns achtersinnig :  wat is ween un wat kümmt op uns to?            

Disse Fraag hett dit Johr een besünnere Bedüden.De Coronapandemie is een grode Last . De Infektionstallen sünd jümmers hoch . Dat Leven in´t ganze Land hett sick verännert . De Bewegungsfreiheit is verminnert un dat Frietietvergnögen is meist afschafft . Wo lang noch ? Avers wi hebbt doch Advent ! Wi hopt dorop , dat uns holpen ward . Un dor is al Licht an´n Enn vun´n Tunnel !Dag för Dag komt wi neger an dat Licht . Un wenn wi dor sünd , dann staht wi vörn Dokter mit een Sprütt in de Hand .He hett wohrschienlich de Erlösung in de Oort vun een Schuulimpen in de Hand . Mag ween , dat dormit dat Enn vun Corona  kamen is ? De Ankunft vun de Hölp för de Minschheit . Wi laat den Kopp ne hangen . Wi tööft op dat grote Lüchten un freit uns op een kommodig Wiehnachtsfest un een gesundet nieget Johr !

Dat wünscht  Ju de Vörstand vun de old ehrwürdige St. Johannes Doden – un Schüttengill vun 1192 e.V.

        In´n  Nomen vun´n Vörstand

        Hans – Peter  Flindt 1. Öllst

Absage Zeltgemeinschaftsschießen und Stadt-Gilde-Pokal

        Leeve Gillschwestern un Gillbröder !

Vuller Toversicht hett de Vörstand dat Stadt-Gill-Pokalscheeten un dat   Teltgemeenschapsscheeten op´n Weg bröcht.        All Anstalten för den Afloop bi de Sportschütten un de Versorgung mit Eten un Drinken ut de Kegelstuuv wieren afslooten. De Freid wier hoch, endli mol weller wat in “GILL”  to maken!

Doch nu schuuvt sick so lütt bi lütt de vermaledeite Corona-Pandemie        jümmers mier to uns in den Norden.         Den Inzidenzwert vun 35 hebbt wi hüüt reten.         De Krink Ostholsteen schickt sick an, een Corona Hot-Spot to warrn.         Uns Kanzlerin Angela Merkel hett seggt, wi schüllt uns an Riemen rieten un all de ne nödigen Dreepen laten!          Wi schüllt unse Gesundheit un de Gesundheit vun uns Mitbörgers nee in Gefohr bringen un uns an leevsten Tohuus in uns Familie opholln.

Disse Opforderung un de hochkrupen Infektionstalen in uns Krink hebbt uns dortau anstött, dat Stadt-Gill-Pokalscheeten un dat Teltgemeenschaps-scheeten för dit Johr aftoseggen.  Uns deit dat bannig Leed.  All de Anstalten för de Dörchföhrung ümsünst.        Uk de Arbeiten vun uns Kröger un vun de Scheetbohnbedrievers, allns för de Katt.        Avers de Gesundheit vun uns all is höger antosetten as de Spoß an´t Scheeten.

Wi vun´n Vörstand laat uns nee ünnerboddern. Wie kiekt vuller Toversicht in de Tokunft un drückt de Duum, dat sick allns weller to uns Best hindreiht.  

   Kopp hoch un blievt gesund!      In Nomen vun uns Vörstand

        Hans-Peter Flindt

        1. Öllst